Бүгінде Қазақстан Республикасында ірі сүт фермалары тапшы. Оның үстіне, республикадағы қайта өңдеуші компаниялардың басым бөлігі қажетті сүттің 75% -дан астамын жеке қосалқы шаруашылықтардан сатып алуға мәжбүр. Бұл өз кезегінде шикізат сапасының төмендеуіне әкелері сөзсіз. Сонымен қатар, жоғары сапалы шикізатпен қамтамасыз етілген ірі фермалар мен шаруа қожалықтарының және мал азығы өндірісінің болмауынан, өңделген өнім көлемі ішкі нарықтағы сұранысты қанағаттандыруға қауқарсыз.
Бүгінгі таңда жүн, сүт және ет өндірісінде Түркістан облысы көш бастап тұр. Ал, өңірдің басым бағыттарының бірі - облыс орталығын азық-түлік өнімдерімен толық көлемде және сапалы түрде қамтамасыз ету. Осыған орай Түркістан қаласының айналасында бірқатар зәкірлік (якорный), яғни басты жобаларды қамтитын азық-түлік белдеуін құру туралы шешім қабылданды. Олардың негізгісі - мал бордақылау алаңы бар тауарлы - сүт фермасын құру жобасы.
«Түркістан» ӘКК» АҚ іске қосылған алғашқы кезеңінде, яғни 2019 жылы 1000 гектар алқапта мал азығы дақылдарын өсіру жобасын бастаған болатын. Бюджет қаражаты мен сол кезде тартылған инвестицияларды пайдаланып, 18 жаңбырлатып суару машиналары сатып алынып, орнатылды. Сондай-ақ егістік алқаптардағы жұмыстарға арналған 26 дана ауыл шаруашылығы техникасы бар машина-трактор стансасы құрылды. Жобаны іске асыру жоспарына сәйкес, жиналған өнім соғылып жатқан өндірістік сүт фермасын қажетті жем-шөп қорымен қамтиды.
Қуаттылығы гольштейн-фриз тұқымды 1200 мал басына арналған жаңа ферманың басты мақсаты - тұрғындарды сапалы сүт өнімдерімен қамтамасыз ету. Ферманың құрылысы Кентау қаласы, Шаға ауылдық округіне қарасты Ынтымақ ауылында 46 гектар аумақта бастау алды. Бүгінгі күні жобаны іске асыру шеңберінде технологияны жеткізушісі анықталып, (итальяндық Rota Guido компаниясы) құрылыс-монтаждау жұмыстары басталды.
Жобаның жүзеге асуы - сүт және сүт өнімдерінің сапасын арттырып, оның көлемін ұлғайтуға ықпал етіп, жаңа жұмыс орындарының ашылуына жол ашады деп жоспарлануда. Болашақта бұл жоба жыл сайын туристер легін арттыра түсетін облыс орталығын сапалы сүт өнімдерімен қамтамасыз етуге мүмкіндік береді.
* Суреттер иллюстрациялық
