2020 жылдың мамырында Түркістан облысының Мақтаарал ауданында су тасқыны орын алып, салдарынан су басқан ауыл тұрғындары апатты аумақтан көшуге мәжбүр болды. Техногенді апат салдарын жою үшін «Түркістан» корпоративтік әлеуметтік даму қоры (бұдан әрі - Қор) арқылы «Түркістан» ӘКК» АҚ жанынан қайырымдылық және демеушілік көмек жинау жұмыстары басталды.

Нәтижесінде Мырзакент ауылында бірнеше айдың ішінде жаңа шағын аудан бой көтерді. Құрылысқа қаражат мемлекеттік бюджеттен және қайырымды жандардың қаржысынан бөлінді. Жаңа ықшамаудандағы үйлер қоныс иелеріне тапсырылды.

Фирдоуси мен Өргебас ауылдарында өз үйлерін салу жұмыстары да аяқталуда. Атап айтқанда, 2020 жылдың 4 желтоқсанындағы жағдай бойынша ауыл тұрғындары 470-тен астам үйдің құрылысын аяқтады, тағы 30-ға жуық үйдің шатыры жабылуда. Естеріңізге сала кетейік, ауыл тұрғындары баспаналарын қордан төленген 17 миллион теңге өтемақы есебінен тұрғызды. Бұл қаражат үш траншпен төленеді және бүгінгі күнге дейін ауыл тұрғындарының жартысынан көбі соңғы траншты алды.