Түркістан облысының инвестициялық тартымдылығының негізгі факторларына өңірдің табиғи-климаттық жағдайлары кіріп, облыстың АӨК дамуына қолайлы жағдай жасайды. Түркістан қаласының азық-түлік белдеуін қалыптастыру шеңберінде ӘКК ауыл шаруашылығы саласындағы жобаларды іске асыруда. Негізгі жобалардың бірі – «1 мың га астам алқапта жаңбырлатып суару жүйесін қолдана отырып, жемшөп дақылдарын өсіру үшін ауыл шаруашылығы кәсіпорнын құру» жобасы. Бұл жобаны іске асыру жоспарына сәйкес 100 шаруашылық жер телімдері біріктіріліп, бірлескен қызмет туралы шарттар жасалды. Жоба аумағында американдық «T-L» фирмасының 18 жаңбырлатып суару машинасы орнатылды және 26 ауыл шаруашылығы техникасы бар машина-трактор стансасы құрылды. Сонымен қатар, итальяндық технология бойынша 1,2 мың бас ІҚМ арналған сүт-тауар фермасының құрылысы жүргізілуде. Егіс алқаптарына су Арыс-Түркістан каналы арқылы жеткізілуде.

Сондай-ақ, «710 га алқапта жаңбырлатып суару жүйесін қолдануды кеңейту» жобасын жүзеге асырылуда. Шаруашылықтарды жер учаскелерімен қамтамасыз ету 67 шаруашылықты біріктіру есебінен көзделген. Аталған жоба аумағында жемшөп дақылдарын, атап айтқанда: күздік бидай, жүгері және жоңышқа өсіру жоспарланған. Жоба аясында австриялық «Bauer» компаниясының 8 жаңбырлатқыш машинасын орнату көзделген.

Жобаның негізгі мақсаты – Түркістан облысының ірі жобаларының бірі болып табылатын «Ордабасы Құс» құс фабрикасына жем-шөпті үздіксіз жеткізуді қамтамасыз ету.