«Түркістан» ӘКК» АҚ ағымдағы жылдың соңына дейін Түркістан қаласының жаңа орталығында орналасқан «Сырдария» тұрғын үй кешенінде 10 көпқабатты үйдің құрылысын аяқтауды жоспарлап отыр.
Түркістанға облыс орталығының мәртебесі берілгелі қала дамуында жаңа серпін байқалып, өңірге күн сайын қаланы түрлендіріп, оның келбетін заманауи ете түсетін жаңа күштер мен инвестициялар тартылуда.
Түркістан қала тіршілігінің барлық салаларын қамтитын, ауқымды құрылыс жүргізілетін орынға айналды. Күн сайын облыс орталығының әр бұрышында жаңа құрылыс ғимараттары салынып, жаңа әлеуметтік нысандар өз есігін айқара ашуда. Сонымен қатар, қала тұрғындары мен қонақтарының демалуы үшін жаңа саябақтар пайда болуда. Өз кезегінде, «Түркістан» ӘКК» АҚ (бұдан әрі – ӘКК) қала тұрғындары үшін жаңа тұрғын үй алаңдарын салумен және облыстың бизнес-құрылымдарының қолайлы жұмыс істеуі үшін қажетті өндірістік ғимараттар құрумен айналысуда.
Мысалы, әкімшілік-іскерлік орталықтың аумағында 44 көпқабатты тұрғын үйі бар «Turkistan Jana-qala» тұрғын алабының құрылысы басталды. Тұрғын үй массивінің құрамына «Арман» тұрғын үй кешеніндегі 29 үй және «Сырдария» тұрғын үй кешеніндегі 15 үй кіреді. Аталған тұрғын үй кешендері ӘКК және тартылған инвестициялардың арқасында салынуда.
Өткен жылы ӘКК 6 тұрғын үйден алғашқы 165 пәтер салып, оларды сатқан болатын. Ал 2020 жылдың соңына дейін «Сырдария» тұрғын үй кешенінде бірінші қабатта коммерциялық үй-жайлары бар 10-ға жуық тұрғын үйдің құрылысын аяқтау жоспарлануда. Одан бөлек, ағымдағы жылдың желтоқсан айында 248 пәтер беру жоспарланып отыр. Сатылатын пәтерлердің ауданы 41,8 м2-ден 82,7 м2-ге дейін болады.
Жалпы, кешен Түркістан қаласының жаңа бөлігінің аумағында орналасқан, онда жақын маңдағы үйлердің тұрғындарының жайлы тұруы үшін барлық жағдай жасалған. Көп қабатты үйлерден жаяу қашықтықта мектеп, музыка мектебі, ауруханалар, спорттық ғимараттар, әлеуметтік және мәдени нысандар орналасқан, ыңғайлы көлік жол айрығы орын тепкен.
Жалпы құрылыс бағыты, оның ішінде қала тұрғындарына арналған тұрғын үйлер салу – ӘКК қызметінің басым бағыттарының бірі. Осылайша, жақын арада Түркістан қаласының ӘІО аумағында ӘКК және тартылған инвестициялармен салынған барлық қолайлы жағдайлары бар жаңа шағын ауданның құрылысы аяқталатын болады.
