2020 жылғы мамырда Өзбекстан Республикасының аумағында Сардоба су қоймасы бөгетінің төменгі бөлігінің шайылуына байланысты су массасы төгілді. Қазақстан жағына бағытталған су Мақтаарал ауданының жекелеген ауылдық округтерін су басты. Нәтижесінде жергілікті ауқымдағы төтенше жағдай қалыптасып, бірнеше ауыл мен егіс алаңдарының басым бөлігі су астында қалды.

Облыс әкімдігі шұғыл түрде толық ауқымды авариялық-құтқару жұмыстарын ұйымдастырды, онда өңірлік уәкілетті органдар, жақын маңдағы аудандардың тұрғындары және еліміздің басқа да немқұрайлы емес азаматтары қолдарыпнан келген көмегін көрсетті. Ауданның 33 мыңнан астам тұрғыны жақын маңдағы елді мекендерде ұйымдастырылған эвакопунктерге көшірілді, барлық қажетті арнайы техника және көлікпен қамтылды.

Бұдан басқа, төтенше жағдайдың салдарын жою, өңірді жедел қалпына келтіру және зардап шеккен халыққа көмек көрсету мақсатында «Түркістан»¹ корпоративтік әлеуметтік даму қоры (бұдан әрі – «Түркістан» КӘДҚ) арқылы қайырымдылық және демеушілік көмек жинау бойынша жұмыс жүргізілді.

«ERG Көмек» КҚ, «Қазақмыс корпорациясы» ЖШС, «Самұрық-Қазына» ҰӘҚ» АҚ, «Kaz Minerals Bozshakol» ЖШС, «Бәйтерек» ҰБХ Холдинг» АҚ, «Кар-Тел» ЖШС, «Hyundai Trans Auto» ЖШС, «BI «Construction Turkestan» ЖШС және басқа да бірқатар ірі компаниялар ақшалай аударымдар түрінде көмек көрсетті.

Нәтижесінде, қайырымдылық және демеушілік көмек түрінде «Түркістан» КӘДҚ-на 9 млрд.теңгеден астам қаражат түсті, олар тұрғын үйді қалпына келтіруге және өзге де көмекке бағытталды, оның сомасын Түркістан облысы әкімдігінің жанындағы арнайы комиссия анықтады. 

1. Мақтаарал тұрғындары эвакуацияланды;
2. Иелерінің өздерінен келіп түскен өтінімдерге сәйкес мал өлімі бойынша өтемақы аударылды;
3. 50,0 млн. теңгеге дренажды ұңғымалар салынды;
4. 500-ден астам отбасына үйлерін қалпына келтіру үшін өтемақы төленді;
5. Зардап шеккен 5300 тұрғынның шотына 1000$ төленді;
6. Мақтаарал тұрғындары үшін 50 млн. теңгеден астам сомаға жиһаз сатып алынды;
7. 10,0 млн. теңге сомасына «Birgemiz – Turkistan» қоры аясында 2 үй құрылысы бойынша инжинирингтік қызметтер төленді;
8. Мырзакент кентіндегі 182 тұрғын үйдің құрылысы «Түркістан» ӘКК» АҚ арқылы «Birgemiz – Turkistan» қоры және «Б. Өтемұратов қоры» жеке қорымен қаржыландырылды;
9. Мақтаарал ауданының төтенше жағдай салдарынан зардап шеккен ауылдарынан 35,8 млн.теңге сомасына 3000-ға жуық оқушыны сауықтыру лагерьлеріне тасымалдау ұйымдастырылды.

Бүгінгі таңда Мақтаарал ауданындағы төтенше жағдайдың салдарын жою бойынша барлық жұмыстар аяқталды.

Меценаттарға және қатысушыларға  қаржылай қолдау көрсеткені үшін және Мақтаарал ауданының қалпына келтірілуінде зардап шеккен тұрғындарға көрсеткен қамқорлығы үшін алғысымызды білдіреміз.

Анықтамалық:

1 «Түркістан» әлеуметтік даму корпоративтік қоры – «Оңтүстік» әлеуметтік даму корпоративтік қоры 2010 жылғы 21 сәуірде құрылды. 2018 жылғы 27 қарашада Түркістан облысы әкімдігінің №322 қаулысымен «Оңтүстік» әлеуметтік даму корпоративтік қорын «Түркістан» ӘКК» АҚ-ға сенімгерлік басқаруға беру туралы шешім қабылданды. 2018 жылғы 29 қыркүйекте Түркістан қаласында өткен Түркістан аймағын әлеуметтік-экономикалық дамыту жөніндегі кеңес барысында Мемлекет басшысы Н.Назарбаевтың тапсырмасына сәйкес 2018 жылғы 14 желтоқсанда «Түркістан» корпоративтік әлеуметтік даму қоры болып қайта тіркелді. Қор қызметінің негізгі түрі өңір халқын әлеуметтік қолдауға және Түркістан облысының әлеуметтік маңызы бар жобаларының қалыптасуына жәрдемдесуге бағытталған жобаларды іске асыру болып табылады.

2 «Birgemiz-Turkistan» корпоративтік қоры – коронавирус пандемиясының таралуы аясында «Birgemiz» қоғамдық қорынан қаражат алу мақсатында 2020 жылғы 30 наурызда «Түркістан» ӘКК» АҚ базасында корпоративтік қор құрылды. Сол жылдың мамыр айында қор Мақтаарал ауданының тұрғындарына көмек көрсету үшін жұмылдырылды.