Қазақстан Республикасының Президенті Қасым-Жомарт Тоқаев ҚР-ң тұрғындарын маңызды дәрі-дәрмектермен қамтамасыз ету қажеттілігін атап өтті. Мемлекет басшысының тапсырмасын орындау мақсатында Түркістан облысының әкімдігі «Түркістан» ӘКК» АҚ облыста дәрі-дәрмектер мен медициналық бұйымдардың тұрақтандыру қорын құру тетіктерін іске асыратын мамандандырылған ұйым ретінде белгіленді.

Тұрақтандыру қорының жұмысы танымал дәрілік заттардың бағаларын ұстап тұруға және дәріханаларды вирустық және суық тию, соның ішінде пневмония мен коронавирустық инфекцияны емдеу және алдын алу үшін эпидемиологиялық маусымда қолданылатын жиі сұралатын дәрі-дәрмектермен қамтамасыз етуге бағытталған. Бұл мақсаттарға жергілікті бюджеттен 317 миллион теңге қаражат бөлінді.

Айта кетсек, медициналық препараттар тұрақтандыру қорының қоймаларында сақталып, облыстың бөлшек желілерінде дәрі тапшылығы пайда болған кезде пайдаланылатын болады. Түркістан облысы Қоғамдық денсаулық басқармасының ұсынысы бойынша Оператор дәрі – дәрмектерді аудандық дәріханаларға нақты тізім бойынша жеткізетін болады, оған облыстағы 54 дәріханалар кіреді.