Су басқан Фирдоуси және Өргебас ауылдарының тұрғындары үй құрылысына арналған қаражаттың екінші траншын ала бастады.
Фирдоуси және Өргебас ауылдарында 500-ге жуық отбасы «Түркістан» әлеуметтік даму Корпоративтік қоры өтемақы ретінде төлейтін қаражатқа үйлер салуда. Бүгінгі таңда 70-тен астам ауыл тұрғыны 4 250 000 теңге көлемінде екінші транш алып, құрылыс жұмыстарын жалғастыруда.
Айта кетсек, Өргебас ауылында 12 үйдің құрылысы аяқталып, олардың кейбіреулерінде ауыл тұрғындары қоныс тойын атап өтті. Сонымен қатар, екі ауылдың құрылыс алаңдарында 443 үйдің қабырғалары тұрғызылды, оның 218-інде шатыр құру жұмыстары жүргізілуде. Жалпы, ауылдарда 1800-ге жуық жұмысшы еңбек етеді, ал «Түркістан» ӘКК қызметкерлері тұрғын үй құрылысы мәселелері бойынша тұрғындарға кеңес беруді жалғастыруда.
Еске сала кетсек, ағымдағы жылдың мамыр айында Түркістан облысының Мақтаарал ауданында төтенше жағдай орын алып, аудан тұрғындарының үйлері зақымданған болатын. Бүгінгі таңда Мырзакент, Фирдоуси және Өргебас ауылдарында зардап шеккен Мақтаарал тұрғындарына арналған тұрғын үйлердің құрылысы бекітілген кестеге сәйкес жалғасуда.
