Бұл туралы өңірлік коммуникациялар қызметінде өткен брифингте Түркістан облысының ауыл шаруашылығы басқармасы басшысының орынбасары Нұрбол Бекмұратов мәлім етті.
Спикердің баяндауынша, пилоттық жоба шеңберінде 16 ауданнан 32 ауылдық округ анықталып, скрининг жұмыстары мен түсіндірме жұмыстары жүргізілген. Бағдарламаны жүзеге асыруға биыл облыс шаруалары үшін бюджеттен 20 млрд. теңгеге жуық қаражат жоспарланды. Бүгінгі таңда 11 млрд теңге қаражат бөлінді. Осының есебінен берілетін микрокредиттер саны 2 200 бірлік және 2 332 жаңа жұмыс орнын құру жоспарланған. Қосымша 8,7 млрд теңге республикалық бюджеттен беріледі. Жалпы аталған қаржыға 4 мыңға жуық адам несиеге қол жеткізетін болады.
Бұл орайда, өткен айда Түркістан облысында аталған бағдарлама бойынша ауыл шаруашылығы саласына арналған 2,5 пайыздық несие беру басталып кетті.

Сондай ақ, Түркістан ӘКК АҚ-ның қаржы және «Ауыл аманаты» бағдарламасының мониторингі жөніндегі басқарушы директоры Нұрлыбек Исаев бүгінде бағдарламаны іске асыру барысында 3 млрд теңге құрайтын 344 жобаға өтініш түскенін хабарлады.
«Мемлекет басшысы Қасым-Жомарт Тоқаевтың ауылдарды дамыту жөніндегі тапсырмасына сәйкес, бағдарламада бекітілген бағыттар аясында биылғы 17 сәуірден бастап құжаттар қабылданып жатыр. Оның ішінде уәкілетті органмен 1,4 млрд теңге құрайтын 270 жоба қаралып, жалпы соммасы 1,04 млрд теңгені құрайтын 225 жоба мақұлданды. Атап айтсам, Созақта - 22, Кентауда - 9, Отырарда - 5, Түлкібаста - 15, Сайрамда - 6, Келесте - 32, Сарыағашта - 7, Төлебиде - 20, Қазығұртта - 27, Шардарада - 2, Арыста - 18, Бәйдібекте - 10, Ордабасыда - 26, Сауранда - 3, Жетісайда - 12, Мақтаралда 11 жоба бар. Аталған қаражаттар есебінен алдағы уақытта қосымша тағы екі ауыл округін қамту жоспарланған. Ауыл әкімдіктері тұрғындар несие алғанша толық сүйемелдеу жүргізеді. Несие алушылар – ауылдық елдімекен тұрғындары және зейнет жасынан аспауы тиіс. Кәсіпті ашуға оқыту жұмыстары тегін жүргізіледі. Әрі несиесін толық жауып, кәсібін дамытатын болса, жеңілдетілген несиеге қайта қол жеткізуге болады», - деді Нұрлыбек Ақылбекұлы.

Еске сала кетсек, «Ауыл аманаты» бағдарламасы бойынша несиелендіру 6 бағытта жүзеге асырылады: өсімдік, мал, құс, балық шаруашылықтары мен ауыл шаруашылығы кооперативтерді жабдықтау және тұрғындардың өз кәсібін ашуға мүмкіндігі бар.