Ағымдағы жылдың 10 ақпанында Өңірлік коммуникациялар қызметі алаңында Түркістан облысында азық-түлік тауарларының бағасын тұрақтандыру және мониторинг жүргізілуі тақырыбында брифинг өтті.

Аталған іс-шараға Түркістан облысының ауыл шаруашылық және кәсіпкерлік басқармаларының өкілдерімен қоса  «Түркістан» ӘКК» АҚ Тұрақтандыру қоры департаментінің директоры Лаура Жанасбаева қатысып, брифинг барысында «Түркістан» ӘКК» АҚ тарапынан атқарылып жатқан жұмыстарға тоқталып өтті.

Баға тұрақтылығын және көкөніс өнімдерін маусым аралық кезеңге қамтамасыз ету мақсатында жергілікті тауарөндірушілермен форвардтық келісім-шарттар жасалып, жалпы көлемі 6099 тонна картоп, 2224 тонна сәбіз, 1850 тонна пияз және 2103,5 тонна қырыққабат өнімдері жеткізілетін болады.

Түркістан қаласының сын келбетіне лайық, әлеуметтік дүкендердің санын көбейту және ауданын ұлғайту мақсатында  көлемі 50 шаршы метрді құрайтын дүкендердің санын 50-ге жеткізу жоспарлануда. Қаланың жаңа ауданынан «Арман» тұрғын үй кешені жанынан  пилоттық жобадағы 1 дүкен салынды.

Қазіргі таңда 13 әлеуметтік дүкен (1-і Кентау қаласында) мен 4 сауда үйлерінде («Береке», «Байтерек», «Дастархан», «Шапағат») тұрақтандыру қорының өнімдері нарықтан төмен бағада сатылуда.

Тұрақтандыру қорынан жеткізілген өнімдерге әлеуметтік дүкендер 5-10 пайыз көлемінде үстеме баға қосып сатса, ірі супермаркеттер 10-15 пайыз үстеме баға қойып сатуда.

Бұл өз кезегінде өнімдердің нарықтан 50 пайызға дейін (пияз, сүт) төмен бағада сатылып, орташа бағаға оң әсерін тигізуде.